O Centro de Estudos Galegos da Universidade Iaguelónica de Cracovia celebra o seu quinto aniversario. Con este motivo, xunto co Centro xemelgo da Universidade de Varsovia, organiza os días 14 e 15 de outubro de 2006 en Cracovia, o primeiro encontro nacional dedicado ás linguas e culturas minoritarias da Península Ibérica nos estudos polacos.
É ben doado observar, que dende hai uns anos, o interese polas culturas e literaturas de Cataluna, Galiza ou País Vasco experimenta un crecemento notable en Polonia, entre os estudosos de filoloxía hispánica e portuguesa, pero non só. As linguas destas nacións ensínanse nas principais universidades polacas, publícanse cada vez máis artigos, estudos e disertacións no ámbito das letras, así como traducións das así chamadas "literaturas minoritarias", as que a pesar do seu estatus periférico, merecen, sen dúbida algunha, unha altísima consideración.
O propósito máis importante do encontro é consolida-las comunidades científicas interesadas pola temática relacionada coas minorías peninsulares, conece-las distintas áreas de investigación, intercambiar experiencias e ideas nos campos da promoción, a didáctica e a traducción. Estamos seguros de que a procura dos posibles lugares comúns e mailas diferenzas van resultar de gran proveito para tódolos participantes.
Outro propósito, non menos esencial para o futuro, é espertar e animar o interese polas linguas e culturas minoritarias da Península Ibérica entre os estudantes, de aí que unha parte importantísima do encontro vana formar comunicacións dos que están iniciando o seu camino intelectual cara ao País Vasco, Cataluna ou Galiza. Por este motivo propónense as seguintes linguas oficiais do encontro: polaco, catalán, éuscaro, galego, castelán e portugués.

Intentaremos cubri-los gastos do aloxamento, polo menos aos estudantes, así como anima-los centros de procedencia a participar nos gastos da viaxe.
Esperamos que a idea do encontro esperte o interese de tódalas comunidades para as que unha das maiores riquezas da Península Ibérica é a súa diversidade cultural e lingüística, de toda a xente que comparte connosco a preocupación polas culturas periféricas nun mundo cada vez máis globalizado.